Temporada
Inverno 2022

• Programa 1 · 28 de Xaneiro
• Programa 2 · 19 de Febreiro
• Programa 3 · 26 de Marzo
• Programa 4 · 01 de Maio
• Programa 5 · 27 de Maio

Tempada 2022 -Ciclo de concertos para o período xaneiro a maio de 2022, composto por cinco programas que se caracterizan pola súa gran variedade, e que serán interpretados, como é habitual, polas formacións de música de cámara, sinfónica e barroca. A Orquestra decidiu ampliar o habitual ciclo de primavera, circunscrito aos meses de marzo, abril e maio, aos meses de xaneiro e febreiro, substituíndo esta denominación pola de “Tempada 2022”. Iso é debido ao incremento do apoio económico por parte do Concello de Vigo que permitirá ampliar o número de concertos ofrecidos á cidadanía sen perder nadiña de nada da súa calidade habitual. Esta tempada de concertos terá a súa continuación no “Ciclo de Outono”, que chegará puntualmente no mes de outubro.

A programación contará como sempre con invitados de auténtico luxo. Desa forma visitarán Vigo figuras internacionais como a violinista holandesa Rosanne Philippens, quen levará a cabo a súa segunda colaboración coa orquestra tras o moi grato recordo que deixou na súa primeira colaboración coa orquestra no último concerto sinfónico previo á pandemia. De novo farao como solista e directora, nun programa que promete ser realmente espectacular, coa disruptora 3ª sinfonía de Beethoven ademais do soado concerto para violín de Brahms.

A este gran concerto sinfónico seguiranlle dúas propostas de música de cámara moi diferentes entre se: en febreiro membros da sección de vento da orquestra interpretará música seleccionada orixinal para quinteto de metais; mentres que en marzo teremos a ocasión de escoitar outra obra de Brahms, neste caso para corda, como é o xenial Sexteto Nº2 op.36, e no que o Ensemble Vigo 430 contará coa colaboración da violinista María Florea (habitual xa nas nosas programacións) e a violista exipcia Sindy Mohamed, artista residente este ano da Orquestra Vigo 430. En abril regresará a orquestra sinfónica cunha proposta nova destinada sobre todo ao público familiar, infantil e xuvenil, como será o programa titulado “As aventuras do Príncipe Achmed”, no que o público poderá visionar a película orixinal de Lotte Reiniger (1926) titulada da mesma forma, e que é a longametraxe animada máis antigo que chegou ata os nosos días, realizado cunha laboriosa técnica de siluetas.

A música foi composta especificamente para esta película polo compositor vigués Brais González, estando a orquestra dirixida por Isabel Rubio, unha tempada máis directora asociada da OV430. O ciclo terá un broche de ouro cun concerto da formación da orquestra especializada na música barroca da OV430, que nesta ocasión contará como solista coa virtuosa intérprete de frauta de pico Lucie Horsch, unha das artistas máis requiridas do momento en toda Europa, e que interpretará concertos para este instrumento de Bach, Vivaldi, Telemann e Sammartini.

A Orquestra Vigo 430 presenta ademais para esta tempada o seu novo programa de socios protectores e abonados, que amplía a figura existente ata o de agora de “amigos da orquestra”, e que busca recompensar con numerosas vantaxes aos seguidores que realizan achegas económicas anuais para apoiar o proxecto.